Kalaallit Nunaani Folketingimut qinersineq 2026

Kommuneqarfik Sermersuumi qinersiviit aamma taasinermi aqutsisut uani takusinnaavatit:

Kalaallit Nunaanni folketingimut qinersisinnaassaguit qinersisinnaatitaassaatit aamma qinersisartut allattorsimaffianni allassimassaatit.

Qinersisartut kommunimi inuit nalunaarsorsimaffianni nalunaarsorneqarfigisimasaminni qinersisartut allattorsimaffianni ilanngunneqassapput.

Sumiiffiit kommunit aggornerisa avataanniittut Kommuneqarfik Sermersuumi taasiartorfissatut atatinneqassapput.

Kalaallit Nunaanni folketingimut qinersisinnaatitaassaatit Kommuneqarfik Sermersuumilu qinersisartut allattorsimaffiannut ilanngunneqarsinnaassaatit, illit:

1. qallunaatut innuttaassuseqaruit,
2. 18-inik ukioqalereersimaguit,
3. Kommuneqarfik Sermersuumi inuit nalunaarsorsimaffianni nalunaarsorsimaguit aamma
4. nammineersinnaassusiiagaasimassanngikkuit

Inuit imm. 3-mi aalajangersimasumik najugaqarnissamut piumasaqaatinik eqquutsitsinngitsut aamma Kalaallit Nunaata folketingimut qinersisarneq pillugu inatsimmik nalunaarut nr. 1167, 8. septembari 2023-meersumi ilaatinneqartut qinersisartut allattorsimaffiannut ilanngunneqarnissamut qinnuteqarsinnaapput. Kommuneqarfik Sermersuumi qinersisartut allattorsimaffiannut ilanngunneqarnissamut qinnuteqarsinnaanerlutit uani atuaruk.

Marsip ulluisa 24-anni 2026-mi Kalaallit Nunaanni Folketingimut qinersissaguit qinersisartut allattorsimaffianni ilanngunneqarsimassaatit. Folketingimut qinersinissamut qinersisinnaasut pillugit qinersisartut allattorsimaffiat ulluni 10 aamma 11 marsi tamanit takuneqarsinnaassaaq.

Kommunimi illoqarfinni nunaqarfinnilu tamani soqutiginnittunit qinersisartut allattorsimaffii najukkami kommunip allaffiisa ammaneranni takuneqarsinnaapput. Nuummi qinersisartut allattorsimaffiat kommunip allaffiani Innuttaasunut Kiffartuussivimmi takuneqarsinnaavoq.

Isumaqaruit qinersisartut allattorsimaffianni pissutissaqanngitsumik mininneqarsimallutit imaluunniit ilanngunneqarsimallutit kommunalbestyrelsimut allakkatigut tunngavilersukkamik naammagittaalliorsinnaavutit uunga valg@sermersooq.gl kingusinnerpaamik 24.03.26

Folketingimut qinersineq pillugu inatsimmi § 26 naapertorlugu inuit qinersisinnaasut qinersinermi qinigassanngortissinnaapput. Taamaaliortoqarsinnaavoq parti Inatsisartuni sassartitaqartoq sinnerlugu imaluunniit partiit avaqqullugit qinigassanngortinnikkut.

Qinigassanngortittunik nalunaarutiginninneq qinersinermi siulersuisut siulittaasuannut kingusinnerpaamik tallimanngornermi marsip ulluisa 13-ianni 2026-mi nal. 12.00 pissaaq.

Qinigassanngortittunik nalunaarutiginninneq Rigsombudsmandimit immersugassaq atorlugu pissaaq, taanna quppernermi uani takusinnaavat: ”Qinigassanngortittunik nalunaarutiginninnermut immersugassat”.

Partii sinnerlugu qinigassanngortittut
Qinigassanngortittoq, parti sinnerlugu sassartoq, partimit akuerineqaqqaassaaq.

Nalunaarutiginninnermi allassimassaaq, qinigassanngortittoq parti sinnerlugu sassartoq. Nalunaarutiginninneq qinigassanngortittumit atsiorneqassaaq aamma qinigassanngortittoq pillugu paasissutissanik ukuninnga imaqassaaq:

• Aqqit tamarmik
• Inuup normua
• Atorfik
• Najugaq

Partiip avataani qinigassanngortittut
Partiit avaqqullugit qinigassanngortittoq, sumiiffimmi qinigaaffimmi ikinnerpaamik qinersisartunit 100-nit toqqagassatut innersuunneqarsimassaaq.

Partiit avaqqullugit qinigassanngortittut kattusseqatigiinnut ilanngussinnaapput.

Malugiuk, qinersisartoq ataaseq qineqqusaartunut arlalinnut innersuussisinnaanngilaq. Qinigassanngortittunut arlaqartunut innersuussisuusoq arlaannaannulluunniit innersuussisutut isigineqarsinnaanngilaq.

Nalunaarutiginninnermi qinigassanngortittoq partiit avaqqullugit qinigassanngortittoq imaluunniit kattusseqatigiilluni qinigassanngortittoq allassimassaaq. Nalunaarutiginninneq qinigassanngortittumit atsiorneqassaaq aamma kattusseqatigiinnit akuerisaasumit atsiorneqassaaq kiisalu qinigassanngortittoq pillugu paasissutissanik ukuninnga imaqassaaq:

• Aqqit tamarmik
• Inuup normua
• Atorfik
• Najugaq

Nalunaarutiginninnertaaq qinigassanngortittup innersuussisuinit atsiorneqassaaq aamma innersuussisut ataasiakkaat pillugit paasissutissanik ukuninnga imaqassaaq:

• Ateq
• Inuup normua
• Najugaq

Innersuussisunit atsiornerit nalunaarummi namminermi issinnaapput taassumaluunniit assilineraniissinnaallutik.

Qinigassanngortittunik nalunaarutiginninnermut immersugassat:

• Folketingimut qinersinermi partiit qinigassanngortitaanik nalunaarutiginninnerit
• Folketingimut qinersinermi partiit avataanni qinigassanngortittunik nalunaarutiginninnerit

Immersugaq uunga nassiunneqassaaq valg@sermersooq.gl 

Ulloq 24. marsi folketingimut qinersinissamut kina taassanerlugu nalunngereerpiuk? Taava massakkut allakkatigut taasisinnaalereerputit. Kommunip illoqarfiini aamma nunaqarfiini tamani allakkatigut taasisinnaavutit.

Qaqugu allakkatigut taasisinnaavunga?

Ulloq 24. marsi 2026-mi folketingimut qinersisoqarneranut atatillugu allakkatigut taasissaguit massakkut allakkatigut taasisinnaalereerputit. Allakkatigut taasinerit piffissaagallartillugu anngutissappat piffissaalluarallartillugu taasinissat nammineerlutit akisussaaffigaat. Folketingimut qinersinermi taasinerit kisitsinermut ilaassappat, taasivissaq piffissaalluarnerani tunniunneqassaaq ullormilu qinersiffiusumi kingusinnerpaamik nal. 09:00 qinersivimmut apuutereersimassalluni.

Allakkatigut taasereersimaguit ullormi qinersiffiusumi qinersisinnaannginnerit eqqumaffigissavat.

Qanoq allakkatigut qinersisinnaavunga?

Ammasarfiit nalinginnaasut iluanni Kommuneqarfik Sermersuumi innuttaasunik kiffartuussivinnut kommunillu allaffiinut saaffiginninnikkut allakkatigut taasisinnaavutit.

Kinaassutsimut uppernarsaammik nassarnissat eqqaamassavat.

Ullormi taasivimmi marsip ulluisa 24-anni qinersivimmut biiliunneqarnissaq inunnut innarluutilinnut pitsorluttunullu neqeroorutigineqarpoq. Biiliutsinnissamik inniminniinissamut attavissat:

Paamiut: 49 92 77

Tasiilaq: 59 82 15

Nuuk: 24 65 59

Ittoqqortoormiit: 36 78 70

Napparsimanerit imaluunniit pitsorlunnerit pissutigalugu 2026-mi marsip ulluisa 24-anni qinersivimmukarlutit qinersisinnaanngikkuit taava taarsiullugu illit angerlarsimaffinniit qinersinissat qinnutigisinnaavat.

Angerlarsimaffinniit allakkatigut taasinissat oqarasuaatikkut saaffiginninnikkut qinnutigisinnaavat uunga 36 70 00-imut sianerlutit, kingusinnerpaamik marsip ulluisa 23-ni nal. 12.00.

Atassut:
Bentiaraq Ottosen
Ellen Schärfe
Malu Ostermann
Orla Joelsen

Inuit Ataqatigiit:
Aqqalukkuluk Fontain
Kalistat Lund
Kuupik J. E. V. Kleist
Naaja H. Nathanielsen
Nivi Rosing
Pipaluk Lynge

Siumut:
Aka Maria Koch Hansen
Ane Lone Bagger
Doris Jakobsen Jensen
Erika Nielsen Baadh
lneqi Skourup Kielsen
Najaaraq Møller

Demokraatit:
Anna Wangenheim
Bent Olesen
Hans Jørgen Mørch
lnuujuk Petersen
Napaartoq Isak Petrussen
Patrick Abrahamsen

Naleraq:
Juno Berthelsen
Karina Zeeb
Najannguaq Hegelund
Oliver Bech
Qarsoq Høegh-Dam

Ullormi qinersiviusumi piffissami 08-21-mi bussit ingerlaartut marlunnik ilaneqassapput, taamaalilluni innuttaasut qinersiartorlutik Nuummi Illorsuaq Timersortarfimmukarsinnaassammata. Bussinut ilaaneq akeqanngilaq. Ingerlaarnissamut pilersaarut ilanngunneqarpoq.

• Qinersiartortunut bussit

Børnehjemsvej aqqutigalugu biilit appakaaffissaat piffissami qinersiviusumi matoqqatinneqassaaq sumiiffillu ataasiinnarmik sammiveqalissaaq allagartalersuinikkut sulisulersuinikkullu.